ميدو في الأدغال

يوم الكدب العالمي

6:27 PM by MeDoOoOoOo


طبعا و ده شيء اساسي ان كل الناس بتكدب حتي و لو كدبه صغننه كده علي صديق علي دكتور علي الاهل و مش عايز حد يطلعلي يقولي لأ مبكدبش لأما والله هضربو شلوت في وشوا يطلع من عينه لأن ابسط كدبه لما سعادتك تلطع واحد في الشارع و يكلمك تقوله انا في الطريق اهوا وانت اصلا متكنف تحت اللحاف المهم انا جيه عليا يوم مسبتش حد مكدبتش عليه و والله الغرض كان شريف كان نفسي اعقد يوم لوحدي و مش في البيت فقولتلهوم كالعاده انا نازل و بيترد عليا طبعا باسم الدلع بتاع كل الشباب " رايح فين يا زفت " فقولت عندي دروس و بتاع و نزلت او بالظبط دخلت الاسانسير لقيت المعيد بيكلمني و يقولي "انا عايز اخلي الدرس النهارده الساعه 6 بدل بكره" قولتلوا كان بودي لاكن عندي حالة وفاه المهم الراجل قاعد يعزي فيا نص ساعه و قفل تنفست الصعداء و خلاص بقي يدوب طلعت اول الشارع لقيت واحد صاحبي بيكلمني يقولي انا نازل وسط البلد يلا مش نازل (كان الكلام ده ساعة مكونت قاعد 24 ساعه في وسط البلد) المهم قلتله دنا بجيب حاجات و مروح علشان عندي امتحان بكره و مفتحتش حاجه المهم قفلت لقيت تليفون من بنت كنت مديها معاد شغل (والنعمه) بتقولي ايه انا مستنياك بقالي ربع ساعه قلتلها معلش اصل واحد صاحبي عامل حادثه و انا معاه و كده المهم البنيه قدرت الموقف و مزعلتش يدوب دخلت الكافيه و قعدت لقيت الشغل بيتصل بيا و حد بيقولي ايه انت مش جاي انت مش عارف ان في اجتماع ولا ايه لا والله اصل انا صباع رجلي الصغير وجعني ايه يا الوطي ده محدش يسأل عليا و جايين تتكلموا في اجتماع المهم قعدت و شربت بوق قهوه او رشفه زي مبيقولوها و لقيت ولد و بنت كانوا بقي معايا في الدراسه من 12 سنه مثلا افتكروني ازاي الله اعلم و هاتك يا رغي و المصيبه بقي ولا فاكر اسمه ولا اسمها و الرغي استمر تلت ساعه و انا بتفرج المهم رحت استأ>نت و توجهت باحترام الي وسط البلد و قولت للواد انا زهقت من المزاكره نزلت اقعد معاك شويه و شويه و روحت عملت ايه في الدرس كان كويس والله . الكارثه بقي اني ساعات ببقي قاعد فاضي ان التليفون يتنيل يرن ولا الهوا قال ايه انا مهم يعني

Posted in 6:27 PM | 5 comments

مش عارف اسميه ايه

5:57 PM by MeDoOoOoOo

وحشني التدوين بس والله مبقتش عارف اكتب ايه و في احتمال تاني اني مبعرفش اكتب اصلا بس الحمدلله في ناس مستحمله الي بكتبه المهم البوست ده ملوش اي هدف من الحياه هو بس قولت اشقر علي المدونه بعد نصيحة ندي و دي اكتر صديقه مستحملاني في الدنيا و خلتني افكر ارجع ادون تاني بس حاليا في مباحثات في دماغي فربنا يسهل كده و اوصل لقرار و الحمد لله انا عديت فترة الاكتئاب و الحمد لله انا سبت الكليه و حاليا انا طالب كلية تجاره و ده انا شايفه شيء رائع علي عكس كل الناس و لكن للأسف في اولي تالت :( بس اهم 4 سنين و ان شاء الله هيعدوا علي خير . و ابتديت ولله الحمد شغلي بقي . بقي عندي شركه محندقه علي ادنا كده و الحمد لله معايا ناس كويسه اوي و بجد انا اتأكدت ان ربنا بيعوض الواحد خير لما يصبر
الحمد لله

Posted in 5:57 PM | 0 comments

أنا مش فارس ولا فتي أحلام

3:30 PM by MeDoOoOoOo


أنا هستعين بأغنيه لفريق بلاك تيما لأني بحب الأغنيه و بعتز بأن في شباب مصري مبدعين المهم يا سيدي الأغنيه بتقول ايه

انا مش فارس ولا فتى احلام
انا زحمة و ربكة و شغل جنان
نص بيضحك و التانى زعلان
انا شيخ فلتان
طيب شرير و جرئ و جبان
اوقات مشرق و اوقات بهتان
و ساعات سلم و ساعات تعبان
مفترى جداً و كمان غلبان
شبابيك و بيبان .... توهة عنوان
انا م الأخر عفريت لابس بدلة إنسان

أنا بقالي كتير اوي مكتبتش علي المدونه وحشتني المدونه ووحشني الناس لكن غصب عني كنت بعدي بزوبعه جامده بجد أوحش شعور في الدنيا كلها الظلم و لما يبقي الظلم من كل ناحيه بتبقي أصعب ممكن أنا بتعاطف مع نفسي بس فعلا انا تعبان و حبيت أبدأ بالأغنيه دي لأن ده أحسن وصف سمعتوا لما يسمي الانسان فعلا محدش فينا فارس و لا فتي أحلام لكن الظلم لما بيصدم بحاجه زي مستقبلك بيبقي حاجه منيله مش صعبه ولما تيجي ترجع لسبب الموضوع تلاقي اهلك تبقي انيل و لما يجوا يحاسبوك علي نتيجة الموضوع مهما كانت و يتهموك بالفشل و هما عارفين انك مظلوم بتبقي حاجه ...... طبعا محدش فاهم أي حاجه ولا أنا والله لكن بجد أنا بعدي بمرحلة اكتئاب قاسيه لأني مره واحده اكتشفت ان كل الي مؤمن بيه من مبادئ ملوش لازمه و ملقتش حد يستحملني أحسن من مدونتي و ناس أنا بتفائل بيهم و بأفكارهم

Posted in 3:30 PM | 16 comments

Happy birth day Medoooooo

12:58 AM by MeDoOoOoOo


عيد ميلادي النهارده 13/7 يا جدعان ، يعني فس سنه راحت و سنه تانيه جايه بتمني تبقي حلوه عليا و علي كل الناس الي اعرفهم يلا كل سنه و انا و الناس الي اعرفهم

Posted in 12:58 AM | 10 comments

قالك أصدقاء

6:40 AM by MeDoOoOoOo



البوست ده للناس الي زي حالاتي الي كل شويه يكتشف اني صاحبه الفلاني خانه و العلاني مش عارف ايه و الكويس

فيهم مات و يكتشف ان حياته كلها ذكريات سوده فينتحر و الا يعمل زيي و ينفض للدنيا كده تحت شعار روق الدي و كبر الجي طيب انا هحاول اديكم نبذه صغيره لاني شكلي توهتكم معايا

بص يا سيدي و انتي يا أخت ركزي معايا و النبي انا ليا حوالي ثلاثة اصحابي من القريبين مني اوي ماتوا في حوادث عربيات متفرقه هما كيشو ، اسلام و أحمد "الله يرحمهم " بس الواحد بيفكر لو انا كنت منهم هل كان هيبقي في حد يزعل عليا زي مانا زعلت عليهم و لا كان هيبقي في حد يفتكرني أصلا ما علينا طيب هيحصل ايه فينا فوق عند ربنا " طبعا الاخوه الملحدين زعلانين مني قوي " محنا معملناش حاجة عدلة أصلا علشان يحصل فينا حاجة كويسة سامع واحد اخواني بيقولي " و انت كل ده و متعظتش " هرد عليه ببساطه أكيد الواحد بعدها اتغير قعدت أصلي بعد كل واحد فيهم شهر و بعد كده أزهق و شكرا مهو مش لازم ربنا يموتلك حد علشان سعادتك تتعظ و برضه انا شاب يا جدعان نفسي اعمل كل حاجة انا عايزها بصوا انا هقولكوا علي حاجة احنا نفكنا من الحوار بتاع الموت ده و نتكلم في نوعيه تانيه من الأصدقاء


أنا كان ليا واحد صاحبي اسمه (س) كنت انا و هو اصحاب جامد يعني 48 ساعة في اليوم مع بعض المهم (س) ده يا سيدي ابوه في السعوديه و ايه المشكله يعني (س) كان مسافرله في اصيف عادي برضه رحت سلمت عليه و وصلته المطار المهم اتكلمنا كام مره علي النت كده و قالي انه هيرجع يوم 31/8 انا بقي بهبل أهلي قولت ده عيد ميلاده يوم 8/9 و هو و البنت الي مرتبط بيها(ص) هيتموا 3 سنين مع بعض يوم 30/8 طيب ايه المشكله ان احنا نعمله سربيس بارتي من المطار علي كافيه و نعمله حركات كده المهم رحت كلمت (ص) الي هيا صاحبته و كلمت معظم اصحابه أقرب ناس ليه و دفعت حجز للكافيه و ظبط الدنيا كله و قبل ميجي بيوم لقتلك 2 من أعز أصحابه الي هما اصحابي برضه بيتصلوا بيا بيقولوي فكك من الحوار ده اقولهم ليه يا جدعان قالولي اصله هيزعل طب هيزعل من ايه متفهمش و طبعا ضاع عليا حجز الكافيه فداه برضه المهم رحت اجيب سعادة الباشا لقيته بيسلم عليا بطراطيف صوابعه قلت تعبان و بعد كده اكتشف ان الي قالولي فكك من الحوار قالولو اني بظبط مع البنت الي مرتبط بيها مش مشكله ان هما يقولوا لكن المشكله انه هو صدق الي يعرفني اكتر من ابويا و امي صدق اني اعمل كده !!!! كانت حاجة توجع قوي بس برضه " الضربه التي لا تقسم ضهرك تقويك " حته لغة عربيه

Posted in 6:40 AM | 6 comments

فلنعطي كل ذي حق حقه

6:34 AM by MeDoOoOoOo

يا جماعه أنا بعتذر عن البوست الي فات انا شيلته و بعتذر للبنت الي اتذكرت في البوست و لكل الي شاف البوست و ضايقه و بعترف ان البوست ده اتكتب ساعة غضب

Posted in 6:34 AM | 2 comments

بنات آخر زمن

2:31 PM by MeDoOoOoOo


أولا والله العظيم الكلام ده حقيقي و ثانيا بقي ل سعادتك مش واخد بالك أكيد هتلاقي صاحبك او صاحبتك واخدين بالهم ان معظم البنات اليوين دول بيعاكسوا وبسفالة كمان لدرجة انك ممكن تخاف تعدي من قدام مدرسة بنات أنا هحكي موقفين يوضحوا للناس . في يوم من الايام نزلت من مترو الأنفاق في محطة غمره الساعة 2 الظهر منت رايح لواحد صاحبي و طلعت من المترو و كنت حاطط سماعه المبي 3 في ودني و ماشي بسمع بصوت عالي و سيت باهتزاز الموبيل فقفلت البتاع ده و انا بطلع الموبيل من جيبي في الوقت ده سمعت صوت 3 بنات عالي جدا و هما بيعاكسوا قعدت أدور علي مين الي هما بيعاكسوه فاكتشفت اني أنا سعي الحظ و ان الموضوع عادي جدا لدرجة ان مفيش كلب في الشارع قالهوم عيب و الشكلة ان بعض الكلمات الي كانت بتتقال احنا كولاد بنخاف نقولها قدام بنات علشان منجرحش حيائهم انا عيز أفهم يعني هما ملهمش اخوات بلاستيك . المهم الموقف الثاني بيحصل مع واحد صاحبي و هو راجع من شغله كل يوم لأنه بينزل من الشغل بينه و بين موقف الميكروباس شارع طوييييييل بس يتمشي يعني لكن للأسف في كارثة في الشارع ده و هي مدرسة بنات في وسط الشارع بدقوا بكلام زي الفل و لما ملقوش استجابه بدأوا يمدوا ايديهم لدرجة ان الواد ا عيني بقي مضطر ياخد تاكسي الحته دي علشان ميعديش عليهم يعني دلوقتي الواحد يخاف ان يتم اغتصابه او التحرش به من طالبه ثانوي او واحده عاديه او بمعني آخر من بنات آخر زمن

Posted in 2:31 PM | 1 comments